Nu  jardinu  du  me  cori
sentu  nasciri  'na  rosa,
russa, ranni e ciavurusa,
dritta  comu  'na  colonna.

Chistu  fattu  mi  ’ mpressiona
ca  si  sta  facennu  largu
nmenzu  a  spini  di  ruvetti
nmenzu  a  pampini  d'ardica.

Tu  cu  si?  ciuri  beddu!
si  la rosa di  l'amuri
di  la  fratillanza  umana
di  la  paci  nta  lu  munnu

Ci rifrettu... pensu  e  pensu
ca  la  sula  so'  prisenza
già  mi  dici  tanti  cosi,
già  mi  fa  pinsari  'o  beni.

Sì! mi fa pinsari a paci,
a omini diversi
ca si parlanu di frati

ca si parlanu d’amuri

A unu riccu, assa’ poviru
picchi unn’addisia nenti,
a un poviru ‘mmeci riccu
picchi è tuttu sintimentu.

chistu pensu. chistu dicu.
e mi piacissi c’ogni omu
avissi un ciuri comu a tia,
nu jardinu du so cori.