ME ZIA
Eranu trent'anni ca un traseva na sta strata, 
quasi un na ricanusceva
ci sunnu villineddi e palazzini 
ca la canciaru e la ficiru moderna
ma c'è sempri du scaluni nfunnu nfunnu
ca m'assittava e mi sinteva u re ru munnu
cu tutti i picciutteddi di la via.

Na iurnata i chista mi ntisi na cosa 
rintro cori, 
na cosa irresistibile;
di quannu me zia si n'era iuta, 
m'era mancatu u curaggiu
accussì turnai 'na la me strata 
a ripìgghiarimi i sogni ra me vita passata
e mi bastò assittarimi na du scaluni
pi riturnari u picciriddu ru stratuni.
Un c'è petra, arbulu o gnunidda 
ca un mi ricorda i iorna luntani 
e a unu a unu spuntaru tutti i picciridii 
ca nastrumentri addivintaru ranni.
Hannu a facci 'nvicchiata
ma i ricanuscivi a tutti, 
un cristianu ri tannu ora è un nannu 
cu tantu ri niputi ca si lu cunnuci pi la via 
comu passiava na da strata io e me zia.
Un m'arresta chi chianciri, 
troppu tempu si ne ghiutu
a vulissi viriri a me zia 
ca mi crisciu comu na matri
scinniri i scali, nesciri na strata, 
chiamarimi o finistruni, 
accattarimi u gelatu 
ma troppu tempu è già passatu.
M'arristaru i ricordi, i lacrimi, u cori straziatu 
e sta strata ca mi talìa mi ricorda me zia
                    e i iorna chiù belli ra vita mia.